الجمعة، 19 أكتوبر 2007

بنوته صغيره

زمان وانا صغيره
كنت بنوته شقيه وقصيره
وشعرى الحرير،اسود طويل..خصلاته دايما مضفره
وعيونى المدوره
كانت بلون طمي النيل دايما منوره

ايامها كانت كل فساتيني قصيره_مانا كنت لسا صغيره_
وكانت ضحكتي بتغير الوشوش المتكدره
*****
عدت شهور وسنين حصل فيهم حاجات كتير
فكيت الضفيرتين وشعرى الطويل خليته قصير
مكانش شكلى بس اللى حصله تغير
بقيت ابص ف مرايتي واقول لنفسي..انتى مين ؟؟
عيوني الحلوين بقيوا مطفيين
فين الشقاوه والبراءه ؟؟ راحوا الاتنين
*****
بياخدني الحنين لايام فاتت عليها سنين ،كنت بنوته صغيره شايفه كل حاجه منوره وبتحلم بحاجات متقدره ،مع ان لسا على الحلم سنين....وبعد السنين لقت الاحلام متدمره